BrewOff! Markapils vs Pilsner Urquell

On juni 5, 2016 By dybingsUnder UncategorizedKommenter innlegget

Pilsner Urquell vs Markapils, Tsjekkia mot Djupdal, 174 års erfaring vs 9 brygg, uroppskrifta vs ei eg fann på internett. Dette kan ikkje bli noko anna enn ein jamn og spanande konkurranse.

Sidan førre Brewoff mottok Djupdalsbrygg mange klager på tvilsam dømming, spesielt frå Sambryggeriet. Onde tunger kritiserte til og med det Nord-Koreanske avstemmingssystemet vårt. Onde tunger skal ein som kjent høyre på, og Djupdalsbrygg sette seg difor igjen på flyet til Pyongyang for å vidareutvikle systemet.

pyongyang

Som ein ser av bilete, var det god stemning med både smil og latter, samt taktfast nikk på hovudet til musikk. (Noko ein sjølvsagt ikkje ser på bilete.) Med våre gode kontaktar hjå universitetet i Pyongyang fekk vi raskt vidareutvikla avstemmingssystemet. No er det faktisk mogeleg å stemme på fleire kandidatar. Underteikna er litt skeptisk til eit slikt frivolt system, men vi har sjølvsagt lagt inn avgrensingar, slik at andre stemmer berre tel som blanke. Det er naturleg nok og moglegheit for å spore opp stemmedissidentane, slik at ein kan sende dei til saltminene.

Med eit nytt og rettferdig poengsystem på plass er det klart for testing. Allereie ved samanlikning av utsjånad ser ein at Urquell er alt for mørk i forhold til Markapils. Det er heller ikkje mykje skum frå Urquellen, medan Markapilsa kanskje skummar litt i overkant.

Utsjånad er naturleg nok ikkje alt, og gutane er klar for smaksprøvar. For å gjere smakinga meir upartisk, har eg fått med naboen på testen. For å imøtekomme alle skuldingar om korrupsjon på FIFA nivå, ser ein at testen ikkje er gjennomført på eit 5 stjerners spa hotell på Aruba, med koffertar fulle i pengar og dyre middagar. At naboen gjekk heim med eit velfylt ObsBygg nett med Djupdalsbrygg hadde sjølvsagt ikkje noko påverknad på smakinga.

Den første supen avslører at det er litt forskjell i smak på dei to. Kloninga mi har ikkje heilt treft mål, men det treng ikkje nødvendigvis vere negativt. Problemet til mange pils sortar er at når dei ikkje er iskalde og heilt ny opna, får dei ein tung og daff pilssmak. Dette har nok med at masseproduksjon på billigast mogleg måte ikkje nødvendigvis gjev nokon smaksfest. Markapilsa er både lysare og lettare enn Urquellen, og den beheld friskheita gjennom heile smakinga.

Og vinnaren er! Djupdalsk pilsner. No var ikkje denne med i konkurransen, men vi opna ei flaske med denne etter dei to andre. Denne er betre enn Markapils, som er betre enn Pilsner Urquell og difor er dette vinnaren av BrewOff. Eg føler at vi denne gang har fått gjennomført eit ryddig og rettferdig konkurranse, med ein verdig vinnar.

#13 Djupdals APA v2.0

On mai 15, 2016mai 15, 2016 By dybingsUnder Brygging, Flasking, OppskriftKommenter innlegget

«Morgonstund har gull i munn» heitast det, men når ein såg kor det gikk med kong Midas, går eg heller for ein kopp med kaffi. Då passer det jo bra at naboen kjem innom. Hermann Frieles mann i Møre og Romsdal, må jo vere rett mann på rett plass. Dagens oppgåve er flasking av Ali, Nøkken og Ingen, samt brygging av Djupdals APA. Når ein går for eit så ambisiøst prosjektet (to ting på ein gong!!!!), er det viktig med forsterkingar!

Medan Grainfatheren varmar vatn til mesk, stikk vi om Ali, Nøkken og Ingen. Litt over 22 liter til flasking.

FG enda på 1,014, som var 0,001 høgare enn målet. Innanfor! Med naboen sin stødige hand er gjæringskaret snart tømt, og ein enda opp med 44 flasker med Ali, Nøkken og Ingen. (Jada, det er 43 flasker på bilete…)

Eg har gått høgt ut med den tyske reinheitslova nokre gangar. Sanninga er at Djupdals APA inneheld 16 % mais i malten, og difor står til stryk. Her luktar det bryggjarhelvete for heile gjengen med lyst øl laga på belgisk gjær i evigheita. Når eg skulle finne eit illustrerande bilete for dette googla eg hell og beer, og då dukka denne blomen opp. Google har jo som kjend aldri feil, så det må vere dette som ventar i bryggjarhelvete?

Premiere+Hope+Serve+Beer+Hell+Arrivals+dpN48Xjd7mWl

Eg trur nok at eg hadde hatt Bjørnson med meg på mais. «Jeg velger mig Mais» hadde nok Bjørnstjerne sagt. Det hadde nok ikkje Hamsund gjort. Han var som kjent meir glad i den tyske reinheitslova.

Nornene er ikkje glad i Djupdals APA, og straffa for brotsverk mot på Reinheitslova kom allereie når kverna kom fram. Maisen kilte seg fint fast. Verken spitord eller nid mot både kvern og mais hjelpte. Ein enda opp med å måtte mikse all malt godt saman for å det gjennom kverna. Og det var ikkje over når malten var kverna. Mais er ikkje bestevennen til Grainfatheren, og det gjekk ikkje lenge før det rann godt i overløpet. Dette er ikkje bra for meskeprosessen, då ein er avhengig av gjennomstrøyming for å få skylt ut gjærbart sukker. Heldigvis gav dette seg etter fem minutt, og ein kan av bileta sjå korleis fargen på vørteret endrar seg under prosessen.

Meskinga gjekk no sin gang og det var tid for ein selfie. Sjølvsagt i ein Djupdalsbryggblå kjeledress. Smiiiiil! Eller kanskje ikkje?

Humle er ein av hovudkomponentane i ølet. Mengda, type og tidspunktet ein tilset humla på vil påverke bitterheit, smak og aroma. No skal ikkje gjere meg til ein stor autoritet på området, men her er ei kort oversikt på det mest sentrale:

Bitterhumle. 60+ min før kok er ferdig. Humle tilset på dette trinnet er berre til å sette bitterheit på brygget. Når humle blir kokt så lenge fordampar smaks- og aromastoff, og ein sit igjen med bitterstoff. Ein kan godt ha same humle på alle trinn, eller bruke spesielle humler for dette trinnet for å få fram den bittersmaken ein ønsker.
Smakshumle. 15 +/- min før kok er ferdig. Når ein tilset humle på dette trinnet er det for å få med smaksstoffa til humla. No rekk ikkje smaksstoffa å fordampe, og ein får tilført ein kombinasjon av smak og bitterheit.
Aromahumle. Mindre enn 5 min igjen til kok er ferdig. Dess kortare tid humla er i, dess mindre av aromastoffa forsvinn. Sjølvsagt vil kontakttid avgjere kor mykje godsaker som blir tilført ølet.
Tørrhumling. Humle tilset under gjæring, men det bør ikkje skje før det er maksimalt 7 dagar igjen til gjæring er ferdig. Det blir litt som aromahumla, men sidan temperatur og kontakttid er forskjelleg, vil det vere andre oljer som blir eksponert frå humla.

Det finnest og dei som tilset humle etter mesking, eller berre dei siste 20 minutta av kokinga for å prøve å oppnå ein anna type bitterheit. Her er det vel sikkert like mange teoriar og meiningar som det finnest bryggjarar.

Typen humle er og avgjerande for kva smakar ein får. Det finnest eit stort utval forskjelleg typar humle. Dei ulike typane kan kombinerast eller brukast åleine alt ettersom kva type øl ein lagar.

Eg har nytta mykje humle rundt 1 minutt og i tørrhumling. Dette gir eit veldig aromatisk og smakfult øl. Problemet her er at humle er «ferskvare», og smaken endrar seg litt etter litt. Etter nokre månader vil ein kjenne mindre humlesmak, og ha eit litt anna øl enn det ein starta med.

Maisen gjorde at skyljing av mesken gjekk treigt, men til slutt var det klart til kok.

Mot normalt gjekk både koking og tapping til kar heilt smertefritt. OG enda på 1,060, noko som var etter oppskrift. Totalt litt over 23 liter til gjæring. Dette gjekk skremmande lett, og eg undrar på kva nornene har på lager for meg no?

Etter to dagar bobler det godt. Eg brukar StarSan(desinfeksjonsmiddel) i gjærlåsen, i tilfelle noko skulle bli sugd tilbake eller renne ned i karet.

Oppskrift:

DjupdalsAPA v2.0 American Pale Ale

Batch Size: 23,00 l

Boil Size: 28,00 l

Boil Time: 60 min

End of Boil Vol: 25,50 l

Final Bottling Vol: 21,00 l

Est Original Gravity: 1,060 SG

Est Final Gravity: 1,012 SG

Estimated Alcohol by Vol: 6,4 %

Bitterness: 34,4 IBUs

Est Color: 16,1 EBC

Mash: 60 min 66 dgr

10 min 75 dgr

Fermentation: 14 days 19 dgr

Amt Name Type

4,60 kg Pale Malt (2 Row) US (3,9 EBC) Grain

1,00 kg Corn, Flaked (2,6 EBC) Grain

0,50 kg Munich Malt – 20L (39,4 EBC) Grain

0,20 kg Caramel/Crystal Malt – 80L (157,6 EBC) Grain

30,00 g Cascade [8,50 %] – Boil 60,0 min Hop

0,50 Items Whirlfloc Tablet (Boil 15,0 mins) Fining

20,00 g Cascade [8,50 %] – Boil 15,0 min Hop

20,00 g Cascade [8,50 %] – Boil 1,0 min Hop

15,00 g Citra [12,00 %] – Boil 1,0 min Hop

10,00 g Admiral [14,75 %] – Boil 1,0 min Hop

10,00 g Vanguard [5,50 %] – Boil 1,0 min Hop

1,0 pkg Safale American (DCL/Fermentis #US-05) [50,28 ml] Yeast

20,00 g Cascade [5,50 %] – Dry Hop 7,0 Days Hop

10,00 g Admiral [14,75 %] – Dry Hop 7,0 Days Hop

10,00 g Vanguard [5,50 %] – Dry Hop 7,0 Days Hop

#12 Ali, Nøkken og Ingen

On april 24, 2016april 24, 2016 By dybingsUnder Øltype, Brygging, Generelt, Oppskrift2 kommentarar

Ein vårdag. Slik ein berre har på Sunnmøre. Med temperatur som får ein røynd polarutforskar til å drøyme om milde snøstormar. Med nedbøren som ville fått Noa til å ta fram hammar og sag igjen, og denne gang ville han vurdert om han skulle tatt med fire av kvar, for no var det alvor.

«Jeg velger meg April» skreiv Bjørnson. Du var ikkje på Sunnmøre når du skreiv det Bjørnstjerne. Her hadde du valt dagen med opplett, slik at Synnøve Solbakken kunne haldt stakken tørr, og gjere guten glad.

gladgut

Det var på ein slik dag at eg bestemde meg for å bli med på Sunnmøre Ølbryggjarfestival. Sidan det er konkurranse, vel eg å ha bortforklaringane klare, i tilfelle det ikkje går vegen. No som eg har fått unnskyldninga om veret klar, er det og viktig å ha nokre syndebukkar. Difor hadde eg fått med Ali, Nøkken og Ingen til å bryggje, og som vanleg er eit skandalearrangement i emninga.

Eg lyt presentere min medbryggjarar. No kjenner eg vel faktisk ikkje nokon som heiter Ali, og difor blir han representert med eit bilete av The Kardashians.

kardashians

Nøkken har vore ein ven gjennom fomlete ungdomsår, og kanskje noko The Kardashians burde nytta oftare?

rfsu-nøkken-kondomet-1-700x700

Ingen heiter eigentleg Inge, men sidan han er frå den sida av fjorden der alle namn endar på n, så blei det Ingen. Vi var litt lei på skulen av at: Ingen hadde smugrøykt. Ingen hadde gjort leksa og Ingen hadde knust ruta. Sidan Ingen eigentleg er ein særs kjekk kar og sikkert ikkje vil bli hengt ut i ein blogg, har eg valt å representere han med eit bilete av Kim Kardashian.

kim

Det er mykje sprut her, så det må vere Sambryggeriet eller Grim og Gryt i flaska?

Her kjem historia om når Ali, Nøkken og Ingen skulle bryggje øl. Ali starta med å fylle vatn, Nøkken stilte temperatur, og Ingen sjekka om brytaren var satt på kok. Når vatne aldri blei varmt, og Ingen skjøna noko, måtte Nøkken gå gjennom innstillingane igjen, og fann ut at Ingen hadde stilt brytaren til mesk noko som gjorde Ali sint. Snart var temperaturen riktig, og i mellomtida hadde Ali målt opp malten, Nøkken fann fram kverna, og Ingen drillen. Ali trudde at Nøkken hadde lada batteriet på drillen, men det var det Ingen som hadde gjort. Når batteriet viste seg å vere tomt var Nøkken irritert på Ali for at Ingen hadde lada batteriet. Heldigvis kom Nøkken på at det var eit reservebatteri i eska.

Når mesken var til kok fann Nøkken ut at Ali trengte ei ventepils. Ingen nemt, Ingen glemt, og det gjorde Ingen ingenting. Nøkken huska faktisk å ha i humle til rett tid, og for ein gang skuld såg det ut som at himmelen var blå bak skyene.

Ali gjorde klart til tapping på fat, og motstraumskjølaren blei kopla på. Nøkken starta pumpa, men der kom det ingenting. Skandale var som vanleg eit faktum. Ali prøvde alle busketriks i boka, med skyljing av kjølaren, blåse gjennom luft, og «sug og start» av pumpa. Ingenting hjelpte. Det var og blei tett.

Til slutt kom Nøkken på ein plan som Ingen hadde tenkt på tidligare. Heile brygget blei tømt over i karet, slik at Ali kunne sjekke filter og pumpe. Det viste seg at Ingen hadde sjekka at gummipakninga på filteret var festa skikkeleg, eller at Nøkken hadde vore borti pakninga når han rørte. Ali var igjen irritert for at Nøkken hadde vore uforsiktig, og at Ingen hadde sjekka pakninga. Pakninga var heller ikkje å finne sjølv om Ali lette overalt. Nøkken meinte at ein kunne teipe igjen enden på filteret, og det hadde Ingen motførestillingar mot. Med det teipa filteret på plass, kunne Ali igjen starte med tappinga, og denne gang fekk ein fylt karet. Til og med pakninga dukka og opp når brygget blei tømt tilbake.

Snart var det 23 liter med Pale ale klart til gjæring, og dei tre venene Ali, Nøkken og Ingen var godt nøgd med dagen.

Oppskrift Ali, Nøkken og Ingen:

OG: 1,052

FG: 1,014

ABV: 5,0%

Boil: 60 min

IBU: 26,7

4,50 kg Pale Malt (2 Row) UK (5,9 EBC)

0,40 kg Crystal Malt – 60L (Thomas Fawcett)

0,40 kg Munich Malt – 20L (39,4 EBC)

0,20 kg Wheat Malt, Ger (3,9 EBC)

10,00 g Simcoe – Boil 60,0 min

15,00 g Ahtanum – Boil 15,0 min

15,00 g Citra – Boil 15,0 min

20,00 g Ahtanum – Steep/Whirlpool 0,0 min

20,00 g Citra – Steep/Whirlpool 0,0 min

10,00 g Cascade – Steep/Whirlpool 0,0 min

1,0 pkg Safale American (DCL/Fermentis #US-05)

20,00 g Ahtanum – Dry Hop 7,0 Days (Hvis Nøkken huska det)

20,00 g Citra – Dry Hop 7,0 Days

Fermentation: 14 days, 19 degree

20131203Reinheitsgebot

Sidan det på bryggedagen var 500 år sidan Vilhelm den fjerde av Bayeren skreiv under på «Das Reinheitsgebot» (den tyske reinheitslova), haldt Djupdalsbrygg seg sjølvsagt slavisk til denne. Det var verken hegrenebb, ananasskal eller koriander i brygget. Her er det vatn, humle, malt og gjær som gjeld.

Studietur, og to brygg på flaske.

On mars 27, 2016mars 27, 2016 By dybingsUnder Etikett, Flasking, GenereltKommenter innlegget

På dagen då kvitekrist fann det for godt å vakne etter ein tredagar (aner ein problem med sommartid og solur?), fann eg ut at eg ikkje hadde skrive om flasking av dei to siste brygga. Då var det berre å ta den virtuelle pennen fatt og kome i gang.

Når ein først er inne på den kristne høgtid, er det vel greitt å ta med kyrkjemannen Martin Luther sine tankar om øl:

“Whoever drinks beer, he is quick to sleep; whoever sleeps long, does not sin; whoever does not sin, enters Heaven! Thus, let us drink beer!”

Med trygg retning mot himmelriket er det ikkje rart at første skandale er eit faktum. Eg har sjølvsagt ikkje klart å tatt eit einaste bilete av flaskinga av Djupdals APA. Eg undrar kva eg har gjort for at Nornene sitt spinn stadig lagar problem for dette brygget?

ESS_PasteBitmap05664

Sidan eg ikkje hadde noko anna, får det bli etiketten som blir Djupdals APA sitt bidrag. Med 1,014 i FG, blei det ABV på 6,3 % på dette brygget.

DjupdalsAPA

Pilsa hadde no vore heile 2 veker på flaske, og då var det sjølvsagt tid for prøvesmaking. (Berre knappe to månader for tidleg, men så var det dette med tolmodet då.) Med meg hadde eg nabo, Hans Eivind, både som korkmester og prøvesmakar. For å sitere: «Den eine blir ein nydeleg pilsner, og den andre smaka ikkje som noko anna eg har smakt.» Kan det bli betre?

Alt går så mykje lettare etter litt prøvesmaking, og snart var vi i gang med Natt. Det manglar ikkje på humle i denne, og eg er særs spent på sluttresultatet her. Svart og fin i dunken. FG på 1,015 og ABV på 6,7 %.

Sluttresultatet blei 34 flasker Djupdals APA, og 43 flasker Natt.

Sjølv om øla no var på flaske, hadde ikkje Nornene heilt gitt slipp på meg, og skandalen var igjen rett rundt hjørnet. Etter å ha limt etikettar på 42 flasker, stod den 43 og stirra dumt på meg. Her var det gjort ein reknefeil, og i motsetnad til NASA, kan eg ikkje skulde på forvirring på meter og fot.

Ein slik ein skulle også den siste flaska hatt.

Natt

Lagera byrjar igjen å bli fulle.

Etter alle skandalane skjøna underteikna at det var på tide med ein studietur. Onde tunger kalla det ferie, men her har det vore eit solid fagleg program med nye ølsortar kvar dag.

No var nok valet av destinasjon meir prega av talet på soldagar, enn tettheita på mikrobryggjeri, men eg må sei at øla i butikk i beste fall kunne nyttast som god tørstedrikk. Kanskje eg skal putte Grainfatheren i bagasjen, og starte opp mikrobryggjeri der sola alltid skin?

Pale ale, #10 Djupdals APA, #11 Natt

On februar 19, 2016 By dybingsUnder Brygging, Generelt, OppskriftKommenter innlegget

«Sunnmøringar rullar stein medan dei søv» såg eg i eit intervju i avisa, og det kan jo forklare kvifor eg er trøtt om morgonen. Ein kan ikkje ligge på latsida på dagen heller, og med pilsa ferdig flaska var det berre å hive seg rundt. Sidan det store kjøeskapet kan brukast til gjæring i to veker til, hadde eg moglegheit til å få satt to batcher til før pilsa var ferdig karbonert.

Eg har lenge hatt liggande eit pale ale sett, og det var på høg tid å få omsetnad på dette. Det var berre å finne fram palen og gjere seg klar.

12715556_1698677157014196_1351834844382468642_n

Sidan underteikna etter kvart byrja å bli uro over om han hadde skjøna pale ale konseptet, enda eg opp med å vere særs vågal og usømeleg. Eg gjekk vekk frå ei skriven oppskrift!

#10 Djupdals APA.

Eg har fram til dei to pils batchane berre brygga ferdige sett, enten frå Vinbua eller Hobbybryggeren. Når ein var ny i faget tykte eg at det var ein grei måte å starte opp på. Ein får kontroll på ein av faktorane, slik at ein kan bruke tid på utstyr og teknikk. Det har derimot aldri vore meininga å fortsette med dette, då det er artig å lage unike øl. Grunnen til at Pale ale settet har blitt liggande, er at eg har sett på dette som det minst spanande av dei eg kjøpte. Sidan eg allereie har mykje lyst, lettsmakt øl, bestemde eg meg for å «pimpe opp» oppskrifta. Med god hjelp frå Knoll i Sambryggeriet endra vi litt på korninhaldet, slik at ein hadde ein kornbase som sømer seg for ein APA. I tillegg lage vi ein langt meir spenstig humleprofil som forhåpentlegvis gir eit velsmakande øl. Hadde vi drive med dunk dunk musikk, så hadde det vore Djupdalsbrygg feat. Knoll. Målet med dette er at ein etter kvart kan ende opp med ein signatur APA for Djupdalsbrygg, og at dette er ein versjon 1.0 av denne.

Eg hadde ein dykkarinstruktør som sa til meg når eg tok dykkarlappen, at det er ikkje dei første dykka som tek livet av deg. Det er når du har nådd 10 dykk, og trur du er verdsmeister at feila kjem. Med denne visdomen i børa, har eg klokka over 70 dykk utan store problem. Dessverre så hadde eg ikkje nokon bryggeinstruktør som gav meg ein tilsvarande livsvisdom, og skandalen var som vanleg rett rundt hjørnet.

Eg må seie at eg har komen godt inn i rutinane, og med Grainfatheren går brygginga stort sett av seg sjølv. No som eg har nådd 10 brygg, og sjølvsagt føler meg som ein verdsmeister, går ting på autopilot. Godt hjelpt av Grainfather Appen som passer på vassmengd, tid osv. Brygginga starta som normalt med at kornet blei kverna, og dette blei tømt i ein ferdig oppvarma Grainfather. Eg rørte godt, og sette på sirkulasjon som vanleg. Eg såg at det for ein gang skuld rann i overløpet, men etter å ha vore på interwebben i ein tidleg fase, fann eg ut at dette ofte var eit problem som gjekk over etter fem minutt. Derfor lot eg det stå og gå i ein time som vanleg, utan å tenke noko meir over det. Skyljinga gikk derimot særs tregt, og eg har i ettertid lært meg nokre fine framandord som heiter Stuck mash. Etter å ha leika litt frøken detektiv fann eg ut at det eg ikkje hadde tilpassa vassmengda på Appen slik at denne blei 23 liter. Dette har gjort at det har vore mindre vatn enn det burde ha vore i meskeprosessen, noko som har gjort at ein har fått dårlig gjennomstrøyming. Eg enda på 19 liter i dunken og 1,062 i OG. Dette gav berre ein målt effektivitet på 62% på mesken, noko som er utruleg dårleg.

Eg brukar å seie til mine EDB brukarar, at problemet er mellom stolen og tastaturet. I dette tilfelle må ein vel seie at problemet var mellom stolen og mobilen, og ein skikkeleg burn tilbake til meg.

Oppskrift: Djupdals APA

Type: All Grain

Batch Size: 23,00 l

Boil Size: 28,00 l

Boil Time: 60 min

IBU: 32,4

SG: 1,060

FG: 1,013

Yeast: US-05

Grain:

4,00 kg Pale Malt (2 Row) US (3,9 EBC) Grain 1 63,5 %

1,60 kg Corn, Flaked (2,6 EBC) Grain 2 25,4 %

0,50 kg Munich Malt – 20L (39,4 EBC) Grain 3 7,9 %

0,20 kg Caramel/Crystal Malt – 80L (150,0 EBC) Grain 4 3,2 %

Mash Steps

Mash In 65,0 C 60 min

Mash Step 75,0 C 10 min

Boil Ingredients

Amt Name Type # %/IBU

25,00 g Cascade [6,00 %] – Boil 60,0 min Hop 5 14,2 IBUs

11,00 g Cluster [7,00 %] – Boil 60,0 min Hop 6 7,3 IBUs

11,00 g Vanguard [5,00 %] – Boil 60,0 min Hop 7 5,2 IBUs

20,00 g Cascade [6,00 %] – Boil 15,0 min Hop 8 5,6 IBUs

0,5 tab Protafloc Tablet (Boil 15,0 mins) Fining

20,00 g Cascade [6,00 %] – Boil 0,0 min Hop 9 0,0 IBUs

15,00 g Citra [12,00 %] – Boil 0,0 min Hop 10 0,0 IBUs

11,00 g Vanguard [5,00 %] – Boil 0,0 min Hop 11 0,0 IBUs

Dry Hop/Bottling Ingredients

Amt Name Type # %/IBU

20,00 g Cascade [5,50 %] – Dry Hop 7,0 Days Hop 12 0,0 IBUs

20,00 g Citra [12,00 %] – Dry Hop 7,0 Days Hop 13 0,0 IBUs

#11 Natt

På en jobbtur til Bergen fekk eg smaken på Svartediket frå 7Fjell. Dette er ein Black IPA, eller Svart Indisk Lyst Øl som det heiter på godt norsk…. Sidan eg ikkje har prøvd meg på noko mørkt øl før, fann eg ut at eg måtte prøve å lage noko liknande. 7Fjell har forresten alle sine oppskrifter på nettet, slik det er mogeleg å hente inspirasjon for den som ønsker det.

Eg har stor sans for Lunsj stripene, og i dette tilfelle kjenner eg meg skikkelig igjen i Kjell.

Kjell

Laurdagen var det fine -4 gr C, noko som skapte dårlig stemning på IPhonen. Batteriet døde ganske kjapt ut, og derfor blei det tatt få bilete denne dagen. Eg fekk etterkvart lada den igjen, slik at fekk tatt nokre bilete av det svarte gullet.

Eg enda litt under forventa OG, men sidan at eg kom ut med 24 liter i dunken så er det vel innanfor forventa margin.

Oppskrift: Natt

Black IPA

Type: All Grain

Batch Size: 23,00 l

Boil Size: 28,00 l

Boil Time: 90 min

SG: 1,068

FG: 1,011

IBU: 63

Yeast: US-05

Mash Ingredients

Amt Name Type # %/IBU

3,00 kg Pale Malt (2 Row) US (3,9 EBC) Grain 1 42,9 %

3,00 kg Pilsner (2 Row) Ger (3,9 EBC) Grain 2 42,9 %

0,50 kg Wheat Malt, Ger (3,9 EBC) Grain 3 7,1 %

0,20 kg Crystal Malt – 60L (Thomas Fawcett) (118,2 EBC) Grain 4 2,9 %

0,10 kg Carafa Special I (Weyermann) (630,4 EBC) Grain 5 1,4 %

0,10 kg Carafa Special III (Weyermann) (925,9 EBC) Grain 6 1,4 %

0,10 kg Caramel/Crystal Malt – 60L (118,2 EBC) Grain 7 1,4 %

Mash Steps

Mash In 64,0 C 20 min

Mash Step 71,0 C 20 min

Mash Step 77,0 C 5 min

Boil Ingredients

Amt Name Type # %/IBU

25,00 g Warrior [15,00 %] – Boil 60,0 min Hop 8 33,4 IBUs

0,5 tab Protafloc Tablet (Boil 15,0 mins) Fining 9 –

40,00 g Ahtanum [6,00 %] – Boil 15,0 min Hop 10 10,6 IBUs

15,00 g Centennial [10,00 %] – Boil 15,0 min Hop 11 6,6 IBUs

15,00 g Simcoe [12,25 %] – Boil 15,0 min Hop 12 8,1 IBUs

40,00 g Ahtanum [6,00 %] – Boil 2,0 min Hop 13 1,8 IBUs

15,00 g Centennial [10,00 %] – Boil 2,0 min Hop 14 1,1 IBUs

15,00 g Simcoe [12,25 %] – Boil 2,0 min Hop 15 1,4 IBUs

Dry Hop/Bottling Ingredients

Amt Name Type # %/IBU

40,00 g Ahtanum [6,00 %] – Dry Hop 10,0 Days Hop 17 0,0 IBUs

40,00 g Centennial [10,00 %] – Dry Hop 10,0 Days Hop 18 0,0 IBUs

15,00 g Simcoe [12,25 %] – Dry Hop 10,0 Days Hop 19 0,0 IBUs

Etter en laaaang dag, var det godt å sjå at skapet var fullt igjen.

Pilsflasking

On februar 17, 2016 By dybingsUnder Flasking, PilsKommenter innlegget

Sidan eg er ny med undergjæra øl, har det vore med spaning eg har følgt med i prosessen. Dette må jo vere ein særs god ide for NRK si neste sakte-TV satsing. Pilsbrygging, minutt for minutt. Litt over tre og ein halv månad med rivande drama og høg dramatikk. Djupdalsbrygg stiller sjølvsagt alle mann alle til eit slikt konsept!

Når eg starta gjæringa sette eg gjæringstemperaturen først til 10 grader. Sidan aktiviteten i byrjinga var særs låg, auka eg temperaturen til 10,5. Då starta det med treige, men jamne plopp frå gjærlåsen. Etter tre veker hadde dette roa seg, og eg gjorde ei måling av FG på begge brygga. Marka pils var kome ned på 1,011, medan Djupdalsk pilsner var enda lågare med 1,008. Dette var der ein skulle vere, og då var det berre å sette i gang med flasking.

Skandalane er som vanleg ikkje langt vekk, og eg fann raskt ut at eg hadde gløymt å kjøpe korker. Her kunne ein ende med opp til fleire fargar på toppene innan for same brygg, og i verste fall ende med julekorkene. Dette førte til både lette pannerynker og flakkande blikk hos ein sindig sunnmøring. I-lands problem vil kanskje nokon seie, men idiotar finn ein som kjent over alt. Heldigvis fann eg etter kvart ein halvfull pose med sølvfarga korker langt inne i skapet. Dagen var redda, og pannebrasken glatta seg ut igjen.

Eg nytta og mine tre siste tomme growlerar for å spare meg litt arbeid. Det skal bli artig å prøve desse når pilsa er ferdig modna. Dunken såg eigentleg ut som ein stor halvliter, og såg særs freistande ut.

Som vanleg vart det smaksprøve under flaskinga. Sjølv om brygget er utan kolsyre og er varmt, smaka det pils. Litt fasinerande var det at det var ein del smaksforskjell på dei to, sjølv om oppskriftene er ganske like. Den einaste store forskjellen er bitterhumla, men det er tydelegvis nok til å gi ulikt smaksbilete. Om denne forskjellen og er der om eit par månader gjenstår å sjå.

Totalt 21,5 l Marka pils, og 25,5 l Djupdalsk pilsner ferdig tappa.

Etikettar

On januar 31, 2016 By dybingsUnder Etikett, Generelt3 kommentarar

Give a man a beer,
waste an hour.
Teach a man to brew,
and waste a lifetime!

Bill Owen

Søndag morgon, kaffi i koppen, bikkja søv, 2 veker til pilsa kan flaskes. På tide å ferdigstille etikettane.

Sidan pils er undergjæra har ein ikkje same aktiviteten under gjæringa som ein ville hatt til vanleg. Det gjekk nokre dagar før det kom skikkeleg i gang, men nå er det ei jamn, treg puttring i gjærlåsen.

Bilete på etiketten er frå ein tur som Stordal turlag hadde til Djupdalen. Sidan eg ikkje har noko særleg med bilete frå Djupdalen så tjuvlåna eg dette. Bilete er omgjort til eit olje maleri via EDB magi, slik ingen kan identifisere nokon av deltakarane på bilete. Eg håpar å få tilgjeving for å ha nytta det.

#8 Marka Pils og #9 Djupdalsk pilsner

On januar 24, 2016 By dybingsUnder Øltype, Brygging, Oppskrift, PilsKommenter innlegget

Etter ein rolig periode med fulle skap og oppussing i heimen, var det endelig klart for bryggedag igjen! Sidan det er nytt år og nye moglegheiter, startar eg året med ølbryggingas Faux pas. Pils. Ordet som får hardbarka ølsnobbar til å gå i lette spasmar, samtidig som dei prøver å skjule eit overberande og nedlatande andletsuttrykk. Hadde det eksistert eit ølbryggingspoliti hadde nok straffa blitt evig drikking av Budweiser(den amerikanske), samt Absolutt Trekkspel 1,2 og 3 i repeat på spelelista.

Pils er inngangsporten for dei aller fleste til øl, og for min generasjon så var det ikkje mykje anna å få i butikkane. Eg må vel innrømme at det går lenge mellom kvar gang eg kjøper ei pils no, men ei god pils er ikkje å forakte på ein varm sumardag.

For meg er pilsbrygging ein test på kor langt eg har komen som bryggjar. Her er det ikkje store mengder humle og gøyme usmak bak. Pils er undergjæra, som betyr at ein nyttar låg temperatur under gjæringa. Dette gjer at alt tek lengre tid. Gjæringsperioden er 3-4 veker, og etter flasking og karbonering, skal flaskene stå kaldt i minst to månader. Lang produksjonstid gjer at reinhald og rutinar er ekstra viktig for å få eit bra resultat.

Eg har valt å gå for to brygg av typen Bohemian Pilsner. For første gong bryggar eg ikkje ferdige sett, men står på eigne bein. Det eine pilsa er basert på oppskrifta Gahr ed pilsner, og den andre ein Pilsner Urquell klone eg fann på Norbrygg si nettside.

Skal ein brygge pils, er det ikkje mogeleg og kome utanom Pilsner Urquell. For å ta litt historikk er Bohemia det tyske namnet på ein del av Tsjekkia. Pilsen er det tyske namnet på den Tsjekkiske byen Plzen. I 1838 var kvaliteten på ølet så dårleg i Plzen at bystyret straffa dei lokale bryggjarane med å tøme ut 36 tønner øl i det offentlege. Det gjekk så dårleg at lokale bryggjarar var i ferd med å bli utkonkurrert av Bayersk og Austerriksk import øl. Gode råd var dyre, og enden på visa blei at dei slo seg saman og bygde eit moderne bryggjeri, basert på Bayersk modell. I tillegg henta dei ein bayersk bryggjemeister kalla Josef Groll. I staden for å bruke det mørk malt som var vanleg i dei tider, laga Groll ein lys malt basert på tsjekkisk korn. Med gjær smugla inn frå Bayern og den lokale Saaz humla, hadde han i 1842 laga den første blonde lagerøla. Ordet Urquell stammar igjen frå tysk. Ur kan bli oversett med «original» og med quell meiner ein «kjelde». Pilsner Urquell er i dag opphavet til 90% av den øla som konsumerast i dag.

Den originale oppskrifta til Groll:

Groll’s Pilsner

(5 gallons/19 L, all-grain)

OG = 1.046 FG = 1.011

IBU = 40 SRM = 3.5 ABV = 4.4%

Ingredients

7.33 lbs. (3.3 kg) pale Pils malt (such Weyermann Pilsner) (1.5–2 °L)

0.75 lbs. (340 g) Weyermann Acidulated malt (1.7–2.8°L)

0.75 lbs (340 g) Weyermann Cara-foam or Briess Carapils (2 ºL)

0.5 lbs. (225 g) Munich malt (10°L)

9.3 AAU Czech Saaz hops (bittering) (2.33 oz./66 g of 4% alpha acid)

1 oz. (28 g) Czech Saaz hops (flavor)

0.5 oz. (14 g) Czech Saaz hops (aroma)

0.3 oz. (8.5 g) Irish moss

1 package of Czech-style lager yeast (such as Wyeast 2278, Wyeast 2124, White Labs WLP800 or White Labs WLP802)

1 cup DME or corn sugar (for priming)

Sidan lageret mitt byrjar å minke hadde eg moglegheit til å frigjere det store kjøleskapet til gjæring. Dette gjer at eg kan doble produksjonen, og at eg kunne gjere to brygg på ein dag. Pils skal som nemnt gjære minimum 3 veker, og om eg skulle nytta det vanlege skapet med plass til eit kar, så ville det ha låst produksjonen min i lang tid.
Marka Pils

Med to brygg på ein dag, så var planen å starte tidleg. Morgonen gjekk dessverre litt i frå meg så eg var ikkje i gang med første mesk før klokka 11. Den første pilsa på programmet var Marka Pils. Namnet er henta frå Gåseidmarka som er kor Djupdalsbrygg er lokalisert. Marka pils er basert på ein Urquell klone. Dette er ikkje ei rein Saaz humla pils, men sidan Djupdalsk pilsner er det, så tykte eg at det var greitt å prøve ei oppskrift med ein litt annan profil.

Oppskrift:

Size: 23,0 L

Efficiency: 73,0%

Attenuation: 73,0%

Original Gravity: 1,050 (1,044 – 1,056)

Terminal Gravity: 1,013 (1,013 – 1,017)

Color: 8,77 (6,89 – 11,82)

Alcohol: 4,92% (4,2% – 5,4%)

Bitterness: 38,0 (35,0 – 45,0)

Mash:
65C i 60 min
75 C 10 min

Boil:
60 min

Ingredients:

5000 g (94,5%) Bohemian Pilsner Malt – added during mash

230 g (4,3%) CaraMalt – added during mash

60 g (1,1%) Munich TYPE I – added during mash

20 g (16,7%) Northern Brewer (10,5%) – added during boil, boiled 60 m

50 g (41,7%) Czech Saaz (2,9%) – added during boil, boiled 25 m

50 g (41,7%) Czech Saaz (2,9%) – added during boil, boiled 8 m

2 pk Saflager W-34/70 11,5g

Fermentation: 21 days 10 C

Bryggeprosessen gjekk greitt. Gjæra var hydrert før bruk, og eg fekk faktisk ut vørter på 10 grader som var målet. Totalt 23 liter til gjæring med ein OG på 1,054.

Djupdalsk pilsner

Med første pils til gjæring så var det bare å peise på for å bli ferdig. Eg er ikkje heilt sikker på om det var Grainfather appen som lura meg, eller om det var eg som måla opp feil, men det blei mykje meir væske enn berekna.

Oppskrift:

OG: 1.047-50
FG: 1.010-14
IBU: 40
Alkohol: 4,7%
EBC: 7
ME: 73%

Volum: 23 liter

Malt:
5,0 kg Pilsnermalt
350g Munich Mørk 25 EBC
Totalt: 5,35 kg

Humle

55g Saaz, 3,5%, FWH
45g Saaz, 3,5%, de siste 30 minuttene
45g Saaz, 3,5%, de siste 10 minuttene
45g Saaz, 3,5%, de siste 2 minuttene
Totalt: 190g

Gjær:
2 pk Saflager W 34-70

Gjæring:
21 grader C 10 dager

Resultatet blei nesten 28 liter pils til gjæring. Eg var redd eg måtte sitte heile kvelden for å koke ned mengda, for å komme ned til korrekt OG. Når eg tok måling vart eg derimot positivt overraska. OG var 1,050 etter 90 min kokning. Ein kan vel få ein ubalanse i forhold til humle, men humle mengda er eigentleg til ein 25 liters batch så eg trur det burde vere innanfor?

Rundt 50 liter til gjæring. Fornøgd med det.

Sju slag til jul

On desember 24, 2015desember 24, 2015 By dybingsUnder GenereltKommenter innlegget

Etter eit knapt halvår som bryggar er eg no klar med sju slag til jul.

No er tida inne for å nyte gøtt øl i triveleg selskap. Eg vil difor ynskje alle ei retteleg god jul frå Djupdalsbrygg!

godjul

Brew-off

On desember 11, 2015desember 11, 2015 By dybingsUnder GenereltKommenter innlegget

Dagen er komen! Brew-off! East coast vs West coast. David mot Goliat. Mesterane mot lærlingen. Sambryggeriet mot DjupdalsBrygg. Bedre Jul mot Julefantasi. Vil Knoll og Tott si pils halde seg i tegneserien? Er DjupdalsBrygg klar for Champions League?

brewoff

Deltakarane:

Allereie før korka er spretta ser ein at skandala er eit faktum. Sambryggeriet stiller med kvite korker på juleølet! Sjølv om det er formildande med juletrykk, luktar det allereie her sisteplass.

Når korksjokket hadde lagt seg var det klart for å fylle glasa.

Den første forskjellen kom ved opning av flaskene. Her var det tydeleg at det var litt mindre kolsyre i flaska frå Sambryggeriet, men begge fekk ein fin skumkant. Også fargen er litt ulik. Julefantasien verkar å vere litt klårare, og har eit delikat mørk farge med eit hint av lysgjennomtrenging. Bedre jul er mørkare, utan at det har noko negativ effekt.

Sidan Knoll er særs glad i godt pålima etikettar, måtte ein sjølvsagt finne eit eksempel på dette.

Tilbake til smakinga bekrefta første supen at Julefantasien var meir sprudlande enn Bedre jul. Dette gir ein litt friskare smak, utan at skilnaden er stor. Etter nokre supar viser det seg at Sambryggeriet har litt meir kropp. Det viste det seg at øla deira og har, noko som gir ein meir fyldig og rund ettermak på Bedre jul.

Guten drikk like bra med begge hendene.

Når ein kjem litt lengre ned i glaset, blir fylden til Bedre jul nødvendigvis ikkje like positiv. Den følast no litt meir tung, medan Julefantasien framleis har friskheita i behald.

Tilbehør til smakinga er viktig. Sidan Særimne er opptatt i Valhall, laut julegrisen gjere jobben med hjelp av saltmat og søtmat. (Dårlig med penger og gull.)

Dommen:

Sidan denne konkuransen sjølvsagt er like korrupt som eit FIFA val, er det utan tvil Julefantasi som er vinnaren. Under dømminga har vi nytta eit poengsystem mykje brukt i Nord Korea, for å gi eit rettferdig resultat.

Vinnaren har ei friskheit og ein smak som gjer at det blir heimesiger. No skal det seiast at det mangla litt fylde og ettersmak i forhold til Bedre jul. Noko som kunne gitt eit anna resultat i ein litt mindre partisk jury.

Alt i alt er det to gode øl som ikkje kjem til å skjemme seg ut på noko julebord. Sidan oppskrifta er om lag lik, er det interessant at det likevel er litt forskjell på brygga, sjølv om ein kjenner at det er mykje dei same smakane i ølet. Oppskrifta er vel ikkje den mest spenstige i julesamanheng, men det gir eit øl som smakar i dei fleste anledningar.